Argazkiak: © Iñigo Sierra | EHUko Kultura Zientifikoko Katedra.
Bilbo Zientzia Plaza (BZP) zientzia-dibulgazioko jaialdiak gaur goizean amaitu du bederatzigarren edizioa, eta horrekin batera, Bilbon zientzia-dibulgazioz betetako hiru asteko egitarauari amaiera eman dio. Irailaren 16tik, BZPk 5 974 pertsona bildu ditu hiriko hainbat gunetan, eta bere zabalkundea handitu du hitzaldien zuzeneko emanaldien eta gero plataforma digitaletan argitaratutako bideoen bidez.
EHUko Kultura Zientifikoko Katedrak antolatutako ekimenak hogeita bi zientzia-hitzaldi, konferentzia bat, sei tailer, hiru ikuskizun, zientzia-lehiaketa bat, intsektuei buruzko erakusketa bat eta dokuforum bat eskaini ditu. Edizio honetan, jarduerak bost gunetan egin dira: Euskalduna Bilbaon, Bidebarrietako Liburutegian, Bizkaia Aretoa-EHUn, Arte Ederren Museoaren inguruetan eta EDE Fundazioaren Guruzu Plaza gunean.
Naukas Bilbaoren berritzea
5 974 lagun inguruk hartu dute parte aurrez aurre Bilbo Zientzia Plazaren barruan antolatutako jardueretan. Jende gehien bildu duten proposamenen artean Euskalduna Bilbaon egindako bi ekimen daude: Naukas Gazte, irailaren 18an, ostiral goizean, DBHko, Batxilergoko eta Lanbide Heziketako ikasleei zuzendua; eta Naukas Bilbao Hastapenak, irailaren 19an, larunbatean, goizez eta arratsaldez.
Hamaseigarren edizioan, Naukas dibulgazio-zientifikoko plataformak eta EHUko Kultura Zientifikoko Katedrak antolatutako Naukas Bilbaok formatu berritua estreinatu zuen, hastapenak ardatz hartuta: Big Bangetik bizitaren hasierara, hizkuntzaren jatorritik igarota eta zientziaren mugetara iritsi arte. Bi jarduerek, guztira, 2 694 pertsona bildu zituzten Euskalduna Bilbaoko Auditoriumean.
Gainera, 848 umek, euren familiekin batera, parte hartu zuten irailaren 20an, igandean, Naukas Kidsen barruan programatutako hiru ikuskizunetan. Ikuskizunak Euskalduna Bilbaon, Bizkaia Aretoa-EHUn eta Arte Ederren Museoaren inguruetan egin ziren.
Edizio honetako beste berrikuntzetako bat BZP Tailerrak martxan jartzea izan da. Ekimen horrek haurrei eta familiei zuzendutako programazioa zabaldu du. Guztira, 510 lagunek hartu dute parte Bizkaia Aretoa-EHUn eta EDE Fundazioaren Guruzu Plazan egindako tailer, ikuskizun eta zientzia-lehiaketetan.
Saio bikoitza Bidebarrieta Zientifikoan
BZPren programazioa irailaren 16an, asteazkenean, abiatu zen Bidebarrieta Zientifikoaren saio batekin. EHUko Kultura Zientifikoko Katedrak eta Bidebarrieta Kulturguneak antolatutako zikloak, gainera, ikasturte berria saio bikoitz batekin inauguratu zuen, irailaren 16an eta 30ean.
Guztira, 322 pertsona hurbildu ziren Bidebarrietako Liburutegira “Natura Bizia (2021)” dokumentalaren emanaldira eta ondorengo solasaldira, baita Aranzadi Zientzia Elkarteko Entomologia Saileko ikertzailea Beatriz Díaz biologoaren hitzaldiara ere.
1 600 ikusle baino gehiago intsektuei buruzko erakusketan
“Intsektuak. Kontatzen duten guztia” erakusketa, irailaren 19tik gaur goizera arte Bizkaia Aretoa-EHUn ikusgai egon dena, edizio honetako jarduerarik bisitatuenetako bat izan da.
1 600 pertsonak baino gehiagok bisitatu dute EHUko Kultura Zientifikoko Katedrak eta Nafarroako Unibertsitateko Zientziak Museoak antolatutako erakusketa, intsektuen aniztasun harrigarria ezagutzera ematen duena.
BZPren bederatzigarren edizioa gaur goizean amaitu da Bizkaia Aretoa-EHUn egindako BZP Tailerraken azken saioarekin. Jardunaldiak ginkana geologiko bat eta auzitegi-medikuen lana gertutik ezagutzeko tailer izan ditu. Horrez gain, parte-hartzaileek hainbat artropodo gertutik ikusi eta ukitzeko aukera izan dute, besteak beste, Herkules kakalardo bat, tximeleta bat eta tarantula bat.
20 478 bistaratze baino gehiago formatu digitalean
Aurreko edizioetan bezala, programatutako hainbat jarduera streaming bidez eman dira eta plataforma digitaletan argitaratu dira. Guztira, kanal horietan eskuragarri dauden hitzaldiek 20 478 bistaratze baino gehiago izan dituzte, zuzenean zein gerora.
Zientzia-dibulgazio jaialdiak irailean zientzia ekarri du berriro Bilboko hainbat gunetara, haurrei eta familiei, gazteei, hezkuntza- eta unibertsitate-komunitateko kideei eta zientzia eta kulturako edukiekiko interes berezia duten pertsonei zuzendutako programa zabal bati esker.
Halaber, lehen aldiz, programatutako proposamenetako batzuek, hala nola “Intsektuek. Kontatzen duten guztia” erakusketak edo “Universo accesible” (Unibertso eskuragarria) ikuskizunak, irisgarritasuna hobetzeko berariazko baliabideak txertatu dituzte. Baliabide horiek ikusmen- edo entzumen-desgaitasuna duten pertsonen, mugikortasun murriztua dutenen eta autismoaren espektroko nahasmendua (AEN) duten pertsonen parte-hartzea erraztea dute helburu.
Bederatzi edizioren ondoren, Bilbo Zientzia Plaza Bilboko zientzia-dibulgazioko egutegian hitzordu nabarmen bihurtu da, eta etengabe eboluzionatzen eta egokitzen jarraitzen du, ezagutza zientifikoa gero eta publiko anitzagoengana hurbiltzeko. Dagoeneko 2027ko irailean egingo den hamargarren urteurrenari begira dago.
Bilbo Zientzia Plaza (BZP) EHUko Kultura Zientifikoko Katedrak antolatutako zientzia-dibulgazioko ekimena da, Euskampus Fundazioaren laguntzarekin eta Bilboko Udala, Eusko Jaurlaritzako Zientzia, Unibertsitate eta Berrikuntza Saila, Donostia International Physics Center (DIPC), EITB eta Nafarroako Unibertsitateko Zientzia Museoa erakundeen babesarekin.